चंदनपुरी

खंडोबाची द्वितीय पत्नी बाणाई हिचे हे गाव, बाणाईचे सौदर्याला भुलून खंडोबाने याच ठिकाणी बाणाई चे घरी धनगराचे रूप घेऊन धनगरवाड्या वर चाकरी केली होती व प्रेम बळाने वश करून लग्न लावून जेजुरीस आणले अशी जनश्रुती आहे. अनेक लोकगीता मधून ह्या कथेचे वर्णन दिसते तीच ही गिरणा नदी काठाची चंदनपुरी.

महाराष्ट्रातील नासिक जिल्ह्या मधील मालेगाव तालुक्यातील हे ठिकाण नासिक – मालेगाव मार्गावर मालेगावचे अलीकडे चंदनपुरी फाट्या पासुन ३ किमी अंतरावर आहे गिरणा नदी काठी असलेल्या या गावातील गाडी रस्त्याने मंदिरा पर्यंत जाता येते.

मंदिरास दगडी कोट असुन पुर्व व पश्चिम बाजुने दरवाजे आहेत. मंदिराचे पुर्वद्वार प्रमुख असुन या या द्वारा बाहेर दीपमाळ पायारीमार्ग व मार्गाचे बाजुने चोथरे आहेत.

पुर्व दरवाजाने आत गेल्यावर पूर्वाभिमुख मुख्य मंदिर दिसते मुख्य मंदिराची रचना मंडप व गर्भगृह अशी आहे. मंडपात जाण्यासाठी पुर्व द्वारास काही पायऱ्या आहेत हे मंदिर पुण्यश्लोक अहिल्यादेवी होळकर यांनी बांधल्याचे सांगतात

पूर्वाभिमुख गर्भगृहात एका पूर्वाभिमुख कोनाड्यात खंडोबा, म्हाळसा, बाणाई यांच्या संगमरवरी उभ्या मुर्ती आहेत. ह्या मुर्ती अलीकडे बसविल्याचे सांगतात या पूर्वीच्या मुर्ती काळ्या पाषाणाच्या होत्या व त्या भग्न झाल्याने या नवीन मुर्ती बसविण्यात आल्या.या मुर्ती समोर लिंग आहे.

मुख्य मंदिराचे मागे कोटाचे पश्चिम दरवाज्याचे दक्षिण बाजुस एका कोनाड्यात शेदूर चर्चित स्थान आहे.

मदिराचे उत्तर बाजुस शिवलिंग व नंदी प्रतिमा आहे.

चंदनपुरी गावाचे पश्चिमेस एका उंचवट्यावर बाणाई चे छोटेसे मंदिर आहे मंदिरातील मुर्ती संगमरवरी आहे.
यात्रा- पौष पौर्णिमेस मोठी यात्रा भरते उत्सव मुर्ती चा पालखी सोहळा या दिवशी असतो. पुढे दहा दिवस यात्रेची गर्दी असते.

————————————————————————